Медиакоммуникация және қоғаммен байланыс 2009 жылдың ақпанында университеттің Ғылыми кеңесінің шешімімен ашылды. Қазіргі уақытта кафедра білім беру бағдарламаларын үш деңгейде дайындайды:
Бакалавриат:
-
6B03205 – Цифрлық медианы басқару
-
6В03214 – Қоғаммен байланыс
-
6В03206 – Спорт журналистикасы
Магистратура:
-
7М03214 – Қоғаммен байланыс
Докторантура:
-
8D03214 – Қоғаммен байланыс
Кафедраның миссиясы мен мақсаты
Кафедраның басты мақсаты — заманауи медиа кеңістіктің сұраныстарына жауап бере алатын, цифрлық технологияларды еркін меңгерген және стратегиялық коммуникация саласында жоғары бәсекеге қабілетті мамандарды даярлау. Оқыту үдерісі келесі бағыттар бойынша кәсіби құзыреттіліктерді қалыптастыруға негізделген:
Цифрлық трансформация және басқару: «Цифрлық медианы басқару» бағдарламасы аясында студенттер медиажобаларды нөлден бастап жоспарлауды, интернет-журналистиканы ұйымдастыруды және жаңа медиа платформаларында контентті монетизациялауды меңгереді.
Стратегиялық PR және имидждік саясат: «Қоғаммен байланыс» (бакалавриат, магистратура, докторантура) бағдарламалары арқылы мемлекеттік және жеке құрылымдардың оң имиджін қалыптастыру, дағдарысқа қарсы коммуникацияларды басқару және халықаралық деңгейдегі PR-жобаларды жүзеге асыру машықтары тереңдетіледі.
Мамандандырылған медиа және спорт индустриясы: «Спорт журналистикасы» бағдарламасы бойынша спорттық іс-шараларды тікелей эфирде трансляциялау, спорттық сараптама жасау және медиа-менеджменттің қыр-сырын меңгерген кәсіби мамандар даярланады.
Шығармашылық пен технологияның ұштасуы: Оқу бағдарламалары телерадио хабарларын әзірлеу, сценарий жазу, телемәтін ерекшеліктерін тану сияқты классикалық дағдыларды жаңа цифрлық құралдармен (SMM, таргетинг, контент-мейкинг) біріктіруге бағытталған.
Кафедраның кадрлық әлеуеті мен басшылығы
Кафедраның ғылыми және педагогикалық әлеуеті жоғары. Жалпы 31 штаттық бірлікті құрайтын құрамда 1 ҚР ҰҒА академигі, 1 ЖАК профессоры, 3 қауымдастырылған профессор (доцент), 2 ғылым докторы мен 5 ғылым кандидаты, 4 PhD докторы және 15 магистр қызмет етеді.
Кафедраның қалыптасу жолында елімізге белгілі ғалымдар мен білікті мамандар — Еуразия телевизия академиясының академигі, профессор Ғ.М. Шалахметов, филология ғылымдарының кандидаты, профессор Оңайгүл Ізтұрғанқызы Тұржан, филология ғылымдарының кандидаты, профессор Аязби Ақбергенұлы Бейсенқұлов, PhD, профессор Индира Садыбекқызы Рыстина, сондай-ақ филология ғылымдарының кандидаты, доцент Серікзат Мақсұтұлы Дүйсенғазы және PhD, доцент Дана Өмірбекқызы Байгожина түрлі жылдары жетекшілік етті. 2024 жылдың қыркүйегінен бастап кафедра тізгінін филология ғылымдарының кандидаты, профессор Гүлмира Шайтмағанбетқызы Әшірбекова қолға алып, абыроймен басқарып келеді.
Халықаралық ынтымақтастық
Білім беру бағдарламаларын халықаралық стандарттарға сәйкестендіру мақсатында әлемдік жетекші университеттерден (Түркия, Оңтүстік Корея, Франция, Ресей, Қырғызстан) белгілі ғалымдар шақырылады. Бұл студенттердің жаһандық медиа трендтерді игеруіне және тәжірибе алмасуына мүмкіндік береді.
